健康提案 Healthnews HK

早前香港大學李嘉誠醫學院兒童及青少年科學系就幼稚園至初小學生嘅身心健康進行調查，收集咗580 名幼稚園學生同 501 名初小學生嘅數據，並以兒童正向身心指數作為標準衡量。

兒童正向身心指數範圍為0 -10點，包括年齡組別 ，體重狀況，睡眠時長 ，靜態活動時間同情緒狀況。每項因素出現變化都會令指數上升或下降，如情緒不佳、長期進行靜態活動等都會令指數下降。

調查發現疫情過後，無論係幼稚園或初小學生嘅正向身心指數都有上升。而喺復課後，初小學生嘅身心健康更有顯著嘅改善，良好指數嘅百份比由 8.4 上升到 10.7。

雖然普遍兒童身心健康看似有好轉，但調查發現相比起幼稚園學生，初小學生嘅正向身心指數仍然較低，甚至有持續下降嘅趨勢。

研究團隊指現時初小學生要應對升小銜接，如須適應新環境、面對學習同社交模式嘅改變，壓力同負面情緒自然難以避免。團隊亦發現尤其係傳統名校區嘅初小學生會有更高嘅情緒問題風險，呼籲家長同政府參考兒童正向身心指數，更確切地支持香港兒童嘅身心健康。