原來女性好容易成為骨質疏鬆症嘅高危一族?
人體骨質密度直到25 – 35歲就會達到頂峰，之後就會出現骨質下滑嘅症狀，而女性喺更年期間更加會加劇骨質流失。而每次生小朋友都會導致媽媽流失大量骨質，過於頻密懷孕都會令患上骨質疏鬆症嘅機會大大增加。體重過輕 (BMI 19以下) 嘅人士都係高危一族，身體會自覺唔需要太強大嘅骨骼而導致骨質流失。除此之外，其實基因問題、藥物影響同埋營養不足都係骨質疏鬆症嘅元兇，大家要及早做好預防，一齊嚟吓點樣從飲食入手喇!
五大富含鈣質食物，唔一定淨係飲牛奶先可以補鈣
要預防骨質疏鬆可以由日常生活嘅飲食入手，除咗牛奶之外其實仲有好多食物都可以幫我哋補充鈣質。
1. (烤) 黑芝麻 :
100克嘅黑芝麻就有約1000毫克嘅鈣質，仲可以降低膽固醇同血壓功效令心臟健康，營養價值非常高。不過油質含量都相對比較高，建議可灑喺白飯上面當飯素配住食。
2. 奇亞籽:
100克嘅奇亞籽就有約830毫克嘅鈣質，奇亞籽有豐富膳食纖維對腸道亦十分有幫助。有好多人都鐘意將奇亞籽加入乳酪、沙律一齊食用，口感豐富。
3. 低脂乳酪:
啱啱就提到好多人鐘意將奇亞籽混合乳酪一齊食用，其實低脂乳酪都含有豐富嘅鈣質㗎! 245克嘅低脂乳酪就有約350毫克嘅鈣質，係餐與餐之間小食嘅好選擇!
4. 硬豆腐:
100克嘅硬豆腐有約320毫克嘅鈣質，硬豆腐鈣含量會比軟豆腐高，而且蛋白質豐富係減肥恩物。不過尿酸過多嘅人士就避免食用喇!
5. 杏仁:
100克杏仁含有約260毫克鈣質，仲有肋降低壞嘅膽固醇，同時為身體增加好嘅膽固醇，作為下午茶小食就最好不過喇，盡量選擇無鹽杏仁避免攝取過多鈉質。
每 天 鈣 質 建 議 攝 取 量 如 下 ：
4 至 6歲: 800毫克
7 至 10 歲: 1000毫克
11 至 13 歲: 1200毫克
14 至 17歲: 1000毫克
18 至 49 歲: 800毫克
4個生活小習慣助你強建骨骼
除咗飲食之外，生活小習慣都可以幫助強建骨骼，減低患上骨質疏鬆症。
1. 攝取維生素D – 維生素D 幫助鈣質吸收，含維生素 D 的食物包括蛋黃、三文魚等等。食鈣片可以補充鈣質，不過進食含鈣質嘅食物可以攝取鈣質以外嘅營養，例如:維生素D。
2. 減低鈣質流失 – 避免攝取過多鹽分，或飲用過多含咖啡因嘅飲品如咖啡、濃茶、汽水、能量飲品等。
3. 多做運動 – 進行跑步、打網球、重訓等受壓運動有助剌激骨質生長。
4. 避免吸煙、飲酒 – 能幫助累積骨本，預防骨質疏鬆。
發表迴響