夏天又到喇，相信唔少家庭都會趁住暑假一家大細一齊去旅行，或者留喺香港去唔同嘅地方玩。不過無論留喺屋企又好，出門進行戶外活動又好，除咗要注意避暑之外，一定要時刻保持個人衞生，唔可以因為疫情完咗就鬆懈。
五月至七月正值手足口病高峰期，手足口病通常係由腸病毒引起，大部分患者會出現發燒、食慾不振、疲倦和喉嚨痛等嘅病徵，口腔內會有潰瘍。而除咗口腔之外，手掌同腳掌，甚至係臀部都有機會出現水痘同紅疹。
手足口病主要係透過接觸患者嘅鼻或喉嚨分泌物、唾液、穿咗嘅水痘同糞便，或者觸摸受污染嘅物件傳播，傳染力十分之驚人。而小朋友對個人衛生仲係冇乜概念，被傳染嘅風險自然會更大，呢個時候就需要家中嘅各位大人幫手把關，齊齊預防手足口病。
1) 飯前、如廁後或接觸穢物後徹底洗手
2) 隨身攜帶含70 至 80%的酒精消毒噴霧或搓手液
3) 咳嗽或打噴嚏時以紙巾掩蓋鼻口，並將用過嘅紙巾棄置喺有蓋垃圾桶。
4) 食飯時要用公筷，盡量唔好同人共享同一食物或飲料。
5) 減少去人多擠迫嘅地方
如果真係唔小心受到感染，患者要盡快求醫後留喺家中直至痊癒，避免同免疫力低嘅人士，如：小朋友同長者接觸，以防傳染他人。
發表迴響