香港嘅夏天一年比一年熱，近期天文台亦已經發出酷熱天氣警告。 天氣炎熱，進行戶外活動時，人體容易因體溫上升，增加出汗同呼吸次數。當生理調節無辦法有效控制體溫，就會出現脫水、中暑等症狀。當感到頭暈、頭痛、噁心、氣促、神志不清、皮膚燙熱、脈搏充盈，好有可能係出現中暑嘅徵兆。
炎熱天氣下進行長時間或高強度戶外活動時，中暑嘅風險就會愈高。當中小童、老人、患有心臟病及高血壓等人士以及癡肥人士更加係中暑嘅高危一族。
今次HealthnewsHK教大家5招預防中暑小貼士，避免因為酷熱天氣而感到身體不適。
1. 透氣：穿著淺色、鬆身及透氣的衣服，可以考慮撐傘、戴寬邊或通風嘅帽同太陽眼鏡。
2. 補水：戶外活動時，應帶備並補充大量水分，以防脫水。亦可以飲用適量含電解質飲料或果汁，補充身體水分。 避免飲用含酒精或咖啡因嘅飲料，以免加快水分經泌尿系統流失的速度。
3. 防曬：戶外活動時，應避免直接受到陽光嘅照射。同時亦要喺外出前30分鐘搽防曬系數為15或以上嘅防曬液，游泳、流汗或以毛巾抹身後亦要再補搽防曬。
4. 降溫：當感到體溫過高，可以稍為鬆脫身上衣物，用水擦拭身體同搧風以降低體溫。 或到附近有冷氣嘅室內地方休息。
5. 避免長時間戶外活動：酷熱天氣警告生效時，應避免長時間戶外活動以及進行高強度戶外運動。即使喺室內，亦應該保持通風及涼快，可以打開窗戶、開風扇或開冷氣。
如果感到不適或懷疑有人中暑，應該立即撥電「999」召喚救護車。患者應移動到陰涼地方，飲水補充水分以及降溫以減輕症狀。 炎熱天氣下或高溫環境中工作嘅人士，可以參照勞工處《預防工作時中暑指引》，採取所需防暑措施。
發表迴響