健康提案 Healthnews HK

鈉同高血壓息息相關？鉀可以降血壓？3大減少鈉同時增加鉀嘅飲食小貼士。

高血壓係香港常見嘅慢性病之一，有調查顯示有27.7% 嘅香港人患有高血壓。同時亦有研究顯示，當人攝取嘅鈉含量愈高，人患上高血壓嘅風險亦都愈大，因為當人攝取過量嘅鈉，腎臟未能完全排出多餘嘅鈉去調節體液容量 ，因而導致水腫，增加血管阻力同令血管壓力上升，長遠而言就引致高血壓。

根據世界衞生組織嘅建議，成年人每日應該攝取少於5克鹽（或2克鈉），但係有健康調查估算香港人平均每日攝取 8.8 克鹽，超出每日鹽攝取量嘅建議。因為好多食物本 身已經含有天然嘅鈉，而香港人成日食嘅加工食品例如加工肉類、麪包同零食、調味料等就含有更多嘅鈉，影響我哋嘅健康。

同一時間，有研究指出，增加攝取鉀都有助降低血壓， 因為鉀有利人體將鈉隨尿液排出體外，減少體液容量，有助調節血壓。加上鉀可以放鬆血管壁，所以可以降低患上高血壓嘅風險。

當我哋知道鈉、鉀同高血壓嘅緊密關係，我哋就要從飲食方面着手預防高血壓。今次健康提案將會同大家介紹3大減少鈉同時增加鉀嘅飲食小貼士。

1. 以新鮮食材例如檸檬、番茄、菠菜等煮成醬汁，代替即食醬料
2. 如果使用醃製或者罐頭蔬菜作為食材，要先沖洗同浸泡去減低鈉含量
3. 使用低鈉嘅天然香料，例如胡椒、蒜頭、薑、葱粒代替調味料

除咗保持健康飲食之外，避免吸煙同飲酒，多做運動， 都可以幫助大家維持理想嘅血壓水平。