健康提案 Healthnews HK

焦慮症係一系列以過度焦慮或者恐懼為主要表徵嘅情緒疾患，患試焦慮症嘅特點係會過度地擔憂同預期危險即將發生。常見嘅焦慮症包括有「驚恐症」、「分離焦慮症」、「社交恐懼症」、「特定恐懼症」同「廣泛性焦慮症」等。焦慮症可以對患者造成顯著嘅困擾並且損害其日常生活。根據《香港精神健康調查2010-2013》香港居民廣泛焦慮症嘅患病率為 4.2%，其他焦慮症嘅患病率為1.5%。焦慮症嘅成因涉及遺傳同埋環境因素，不論係家族病史、童年創傷經驗、父母本身嘅焦慮表現、定生活壓力等都係造成焦慮症嘅風險因素。而焦慮症的主要徵狀包括突如其來的心跳及呼吸加速、胸部及腹部不適、口乾同出汗等。

所以焦慮症喺生活壓力尤其高嘅香港係十分值得我哋關注嘅，今次嘅健康提案會分享四個小貼士去幫助大家照顧身邊嘅焦慮症患者！

1. 不要責怪
   患者可能會因一些旁人難以理解嘅原因感到焦慮同迴避社交、不願意出門。家人應了解病況同成因，唔好責怪患者，以免令患者更加困擾。
2. 耐心聆聽
   鼓勵但唔勉強患者講出感受同困難之處，耐心聆聽，表示諒解患者，給予充分時間同適當嘅支持。
3. 鼓勵社交
   鼓勵患者維持社交活動，例如保持與投緣或感覺良好嘅人接觸。
4. 留意變化
   焦慮症患者亦可能同時受到抑鬱情緒困擾。應留意患者病情嘅變化，如果發現有自殺傾向或者行為有異時， 盡快向專業人士求助。