健康提案 Healthnews HK

社區體育事務委員會2023嘅「全港社區體質調查」報告指出超過50%香港市民嘅體能活動量未達到世界衞生組織（世衞）建議嘅水平，即係兒童及青少年平均每日參與至少60分鐘中等至劇烈強度嘅體能活動，而成人則應該每星期參與至少150分鐘中等至劇烈強度嘅體能活動。

香港人生活咁忙碌自然好難抽時間出嚟做運動，但係長時間坐低唔郁有損健康，仲會增加患上心血管病、癌症同二型糖尿病等疾病嘅風險，甚至增加死亡率，所以大家可由每日多步行做起。其實步行已經係一種最簡單嘅運動，亦都係最有效促進健康嘅運動之一。有研究證實，經常急步行，例如喺十五至二十分鐘內走完1.6公里，已經可以對健康有長遠嘅益處。

急步行比我哋想像中有更多嘅好處，例如燃燒卡路里，幫助保持健康嘅體重、減低患上心臟病、高血壓同糖尿病嘅風險、改善心肺功能、預防骨質疏鬆症、改善身體靈活度同平衡力等等。今次健康提案將會同大家介紹4大步行貼士。

1. 以步行代替乘車，或者提早一至兩個站落車步行到目的地
2. 因應自己嘅健康同體能狀態選擇自己能夠應付嘅強度、時間同次數
3. 佩帶計步器，同時訂立可行嘅目標
4. 步行前進行熱身運動，伸展下肢肌肉同鬆弛轉動關節