奇亞籽內含多種人體必需蛋白質同礦物質，有十分之高嘅營養價值，喺近年嚟甚至被追捧為Superfood (超級食物) 同減肥恩物，但係其實奇亞籽同其他食物一樣都係唔可以過度攝取，食之前一定要留意佢嘅副作用！
奇亞籽嘅4大副作用：
1) 腸胃較差人士容易造成消化不良
奇亞籽睇落細細粒，好似好易消化咁，但係其實佢入面含有好多人體消化唔到嘅纖維！雖然適量纖維對健康有好處，可以促進腸道蠕動，但過量攝取纖維可能會引起肚痛、肚痾同便秘等問題，而對於本身腸胃就唔好嘅人嚟講，嚴重起上嚟仲有可能會造成腸胃阻塞，真係「籽」不可貌相。
如果想避免腸胃唔舒服，食之前記得要將啲奇亞籽預先用水浸發15分鐘，而食嘅時候都記得要飲多啲水幫助消化。
2) 降血壓功效過強 低血壓、孕婦及老人家慎用
奇亞籽其中一個好處就係富含Omega-3，呢種脂肪酸有抗凝血同幫助控制血壓嘅功效，服用緊抗凝血劑嘅病人、低血壓人士、孕婦同老人家要盡量避免食用喇！
3) 鉀含量高 腎病人士注意
奇亞籽內含豐富蛋白質同礦物質，其中一種就係鉀，腎臟功能唔好嘅人要小心攝取，以免造成腎臟額外嘅負擔。
4) 宜留心會否對奇亞籽過敏
食用奇亞籽都有機會出現食物過敏，如果你本身係對芝麻或者其他種籽類食物過敏，記得大量食用前要試食咗先，check清楚自己有冇過敏，萬一出現過敏反應就盡早去求醫！
發表迴響