相信大家都好鍾意食嘢，特別係「生冷」食物。「生冷」食物其實係指生或未煮熟嘅食物。例如以生蛋製作嘅芒果布甸、煙三文魚三文治，未煮熟嘅牛肉作配料嘅生牛粥，同埋供生吃或未煮熟嘅海鮮等等。但係食生冷野又有咩風險呢？
其實「生冷」食物好容易引起食物中毒，因為佢冇經過熱處理或者熱處理不足，未能消滅當中可致病嘅微生物，令我哋進食到細菌或病毒引起食物中毒，病徵包括嘔吐、腹瀉、腹痛及發燒。甚至乎引起寄生蟲感染，有啲寄生蟲仲可引致輕度至中度嘅腸胃症狀！另外生或未煮熟嘅食物都可能帶有具有抗菌素耐藥性嘅「超級細菌」，可抑制多種抗菌素(例如抗生素)。烹煮可殺死食物中嘅「超級細菌」，而生或未煮熟嘅食物則容易存有微生物，透過進食途徑感染人類。呢啲「超級細菌」無論有冇致病性，都可能將抗藥性基因轉移到人體內嘅其他細菌，令到我哋日後使用抗生素治病嘅時候藥效有可能受到影響。
咁咩人進食「生冷」食物有較大機會出現嚴重症狀，甚至會有生命危險呢。今次嘅健康提案會提醒大家五大進食「生冷」食物嘅高危人士！
1.嬰幼兒
嬰幼童對食源性致病菌嘅自身防禦功能較弱，因為佢哋嘅免疫系統尚未發育成熟，同時腸道內嘅菌羣所起嘅保護作用可能不如成年人有效。初生嬰兒嘅胃部酸性較成年人低，所以細菌同其他致病菌較易在其體內生存。此外，按體重比例計算，嬰兒同幼童較成年人進食更多食物，所以假如食物含有毒素或污染物，佢哋嘅相對攝入量會較高。
2.孕婦
懷孕期內荷爾蒙同免疫力嘅改變會削弱孕婦嘅免疫系統功能，令佢哋較易從「生冷」食物感染食源性疾病。另一方面，發育中嘅胎兒都易受一啲唔嘅會令孕婦出現病徵嘅食源性致病菌影響。例如李斯特菌可以嚴重影響胎兒嘅發育，甚至導致死亡。
3.長者
長者自身防禦同抵抗感染嘅功能會隨年齡增長而逐漸下降，有啲長者如果患有糖尿病等慢性疾病，佢嘅免疫系統功能更可能會因疾病或治療而進一步被削弱。
4.免疫力較弱人士
患有免疫系統疾病，例如愛滋病同慢性疾病如癌症；或接受咗減低身體免疫反應嘅治療，例如抗生素治療、抗胃酸藥、長期服用類固醇或預防移植手術後出現排斥嘅藥物等等嘅病人喺進食「生冷」食物都較易患上食源性疾病或出現併發症。
發表迴響