小朋友唔滿足就大吵大鬧 台灣媽媽5字真言教仔大法!唔少媽媽都用錯方法⋯⋯

小朋友成長必定會對唔同事物感到好奇,但作為父母,未必事事都可以滿足小朋友嘅願望。 台灣有媽媽喺Facebook請教其他家長,表示自己嘅小朋友一歲九個月大,經常因為滿足唔到願望或者得唔到想要嘅嘢,就會大吵大鬧,甚至郁手打人。

有媽媽分享簡單五個字嘅建議,就係「堅定且溫和」!

第一招:堅定嘅原則

第一種堅定係指唔可以過分溺愛小朋友。假如條件不足或者各種原因冇辦法給予小朋友想要嘅野,唔可以因為小朋友發脾氣而心軟滿足佢哋嘅願望。要令佢地明白唔係發脾氣、大吵大鬧就可以得到玩具,大人應該要堅持原則。

第二招:堅定嘅訓話

另一種堅定係指要明確教導小朋友胡亂發脾氣嘅行為係唔啱嘅,從而由細建立正確嘅價值觀。

第三招:溫和嘅耐性

一歲九個月嘅小朋友並未完全培育出溝通能力,所以溫和包含耐性,要有耐心慢慢浸淫、培育小朋友嘅價值觀。

第四招:溫和嘅安撫

另外,小朋友扭計、鑽牛角尖嘅時候,都要用溫和嘅方式安撫佢地嘅情緒,多啲抱吓小朋友、拍下佢地背脊,或者嘗試轉移佢哋嘅注意力。

錯誤方法:體罰

無論當下小朋友有幾大吵大鬧,作為父母都感到好頭痛,但千祈唔好訴諸於體罰,小朋友的確會因為體罰而唔再吵鬧,但並唔係因為知錯,而係因為怕而唔再亂發脾氣,小朋友亦可能因為體罰而產生陰影。

台灣媽媽仲補充,要有順暢嘅教育之路,必先要從小建立規範, 以「堅定且溫和」嘅方式,明確指出小朋友做得唔好嘅地方,同時亦要安撫小朋友嘅情緒。 而咁多位媽媽除咗要照顧小朋友嘅情緒,亦都要留意自己嘅心理狀況,定時為自己釋放壓力呀!

發表迴響