健康提案 Healthnews HK

最近疫情穩定落嚟，香港人嘅生活都總算返回正軌。不過霎時間要適應疫情後生活上嘅轉變，真係唔係話咁易，想冇壓力都難啦！雖然適量嘅壓力可以推動人去努力，有助提升做事效率同表現，但係當壓力越煲越大，只會對身心造成負面影響，例如：集中唔到精神、成日覺得攰同冇曬食慾等等，心理同身體狀況自然每況愈下。

想活得開心同健康，就一定要學識處理壓力，將佢維持喺適量嘅水平，今次HealthNewsHK就整理咗五個面對壓力嘅有效方法，等大家可以同過多嘅壓力講byebye！

1) 洞悉壓力來源再加以解決
要徹底消除壓力，最緊要就係搵出造成壓力嘅原因，盡快採取行動，唔好比佢累積落去。如果件事未必係咁易解決到，就要試吓改變心態，令自己睇開啲。

2) 凡事量力而為 制定可行計劃
對自己有所期望固然係好事，冇期望又點會進步呢？不過大家要識得量力而為，根據自己嘅能力去制定可行嘅計劃，一步一步去實踐，對自身要求過於嚴苛、事事執著完美只會令自己超載。

3) 建立健康生活習慣
要對抗壓力，緊係唔少得健康嘅生活習慣啦！除咗健康飲食同足夠睡眠之外，大家可以抽時間做吓運動，特別係帶氧運動同伸展筋肌嘅動作，釋放身體緊張同壓力。

4) 提升處事能力及效率
想做事更加有效率，就要識得將佢哋按迫切性同重要程度去排序，再逐樣解決。而遇到比較複雜同難嘅問題，與其諗方法去逃避，倒不如諗吓點樣將佢哋拆做幾個部分，等自己可以輕易去分批處理。

5) 尋求社交支援
壓力太大嘅時候，不妨試下搵身邊嘅人傾訴，除咗可以幫助自己調節情緒之餘，仲可以問吓佢哋嘅意見，增加解決難題嘅機會。